Deputetja e LSI-së Monika Kryemadhi, e ftuar në emisionin “Top Story” të gazetarit Sokol Balla, ka folur për statusin e saj të ardhshëm si Zonja e Parë, pasi Ilir Meta të marrë postin e Presidentit të Republikës.
Ndërsa Sokol Balla e pyet nëse Kryemadhi ka konflikt interesi në politikë tanimë, duke qenë edhe zëvendëskryetarja e LSI-së dhe Zonja e Parë së shpejti, Kryemadhi e ka mohuar një gjë të tillë. Sipas saj, kjo për shkak se presidenti nuk zgjidhet nga populli por nga Parlamenti.
“Nuk mendoj se ka konflikt interesi sepse presidenti nuk zgjidhet nga populli. Nuk është institucion politik, por thjesht një status, një shoqëruese e presidentit në takime zyrtare. Zonja e Parë krijon ‘framing’ e presidentit. Nuk ka të bëjë fare me Monikën si individ. E kam thënë edhe më parë se të gjitha gratë shqiptare janë zonjë e parë në shtëpitë e tyre. Dëshira ime është të punoj fort për përfshirjen e grave në biznes, politikë dhe vendimmarrje. Ky është një mision që nuk ka të bëjë me Zonjën e parë, por çdo zonjë e parë duhet të japë kontributin e saj.”, shprehet Kryemadhi.
Ndër të tjera, zëvendëskryetarja e LSI-së ka sqaruar sloganin e kësaj force politike në këtë fushatë zgjedhore “LSI një shans për të gjithë”.
“Një shans për të gjithë është mundësia për të patur një mundësi çdo individ në mënyrë të barabartë.
Do të thotë që shqiptarët të kenë mundësi të shohin në parti shpresën që ka humbur.
Shqiptarët do të votojnë LSI-në sepse ka prioritet rininë, sepse të kesh prioritet rininë do të thotë të kesh prioritet të ardhmen, të ardhmen e vendit, të fëmijëve tanë. Jam e bindur që nuk ka prind që të mos dojë që fëmijët e tyre të kenë shansin dhe LSI ua jep këtë.”, shprehet deputetja. (D.D/Shuplaka)
