Plagosen 5 minatorë në Klos, 3 prej tyre nisen me urgjencë drejt Tiranës

5 minatorë janë plagosur në minierën e Shëngjunit në Klos, ndërsa ishin duke punuar në galeri.

Një masiv dherash dhe gurësh ka rrëshkitur mbi ta duke i lënë të plagosur.

3 prej të plagosurve janë nisur me urgjencë në drejtim të Tiranës, ndërsa dy të plagosurit e tjerë po marrin ndihmën mjekësore në Spitalin e Burrelit.

Deri më tani nuk janë bërë të ditur identitetet e tyre, ndërsa dy prej të plagosurve paraqiten më rëndë.

Nderkohë, Kompania AlbChrome njofton se ditën e sotme, në orët e para të mëngjesit në Traverbankun e Klosit ka ndodhur një avari në të cilën janë aksidentuar 5 punonjës.

Ne deklaraten e kompanisë thuhet se nga kompania janë marrë masat e menjëhershme për të bërë trajtimin e duhur mjekësor të të lënduarve, të cilet pasi janë dërguar në spitalin rajonal të Burrelit, është konstatuar nevoja që 3 prej tyre të dërgohen në Spitalin e Traumës në Tiranë.

Menjëherë këta 3 punonjës janë dërguar në Spitalin e Traumës dhe pas ekzaminimeve konstatohet që aktualisht të 3 punonjësit janë jashtë rrezikut për jetën.

Avaria është shkatuar nga pakujdesia e dy prej punonjësve të cilët nuk kanë zbatuar rregullat e sigurisë në punë.

(E.K/FAXWEB)