Një person, deri më tani dyshohet se është Alfred Lika vëllai i kryetarit të PD-së në Mat, është plagosur rëndë nga përplasjet e dhunshme në Burrel dhe Klos mes qytetarëve dhe Policisë së Rendit.
Sipas raportimeve paraprake sqarohet se ai është goditur me shkop gome në pjesën e paskokës nga efektivët e policisë duke marrë plagë të rënda.
Lajmi është konfirmuar dhe nga burimet e Partisë Demokratike e cila ka shpërndarë një njoftim per media ku thuhet:
Nje person eshte plagosur ne Burrel, kur qytetaret ishin duke zbatuar dekretin e Presidentit, ne mbrojtje te kushtetutes. Ai quhet Alfred Lika, i cili eshte goditur nga Forcat Speciale, te cilat, ne paligjshmeri te plote me veprimet e tyre, i kane shkaktuar fraktura te renda ne koke. Alfred Lika, vellai i Kryetarit te PD, Burrel, eshte nisur me helikopter drejt Tiranes.
Përplasje të dhunshme u shënuan në Burrel në KZAZ-në Nr.16 ku mbështetës të PD-së dhe policë bashkiakë u përplasën me ato të rendit në përpjekje për të liruar ambientet nga materialet zgjedhore të KQZ-së. Pas disa tentativash qytetarët arritën t’i nxirrnin këto materiale dhe i dogjën, ndërsa u raportua për disa të plagosur nga konfrontimet fizike në Burrel dhe Klos.
Kryebashkiakët e zgjedhur nga PD dhe aletatët e saj prej ditësh kërkojnë zbatimin e dekretit të Presidentit Meta për shfuqizimin e zgjedhjeve të 30 qershorit dhe lirimin e të gjitha mjediseve të vëna në dispozicion procesit zgjedhor.
