Policia e Korçës ka identifikuar dhe ka shpallur në kërkim autorin e dyshuar të ngjarjes në fshatin Bulgarec, ku mbeti i plagosur 38-vjecari me iniciale V.F.
Sipas policisë 31-vjecari me iniciale L.R është shpallur në kërkim nga policia pasi akuzohet se ka qëlluar dy herë me armë zjarri gjahu 38-vjeçarin për motive të dobëta.
Detaje:
Në vijim të informacionit paraprak datë 19.01.2017, ju bëjmë me dije se specialistët e sektorit për Krimet e Rënda në Drejtorinë Vendore të Policisë Korçë, filluan: procedimin penal si edhe bënë shpalljen në kërkim të shtetasit : L.R, 31 vjeç, banues në fshatin Podgorie – Maliq.
Procedimi ndaj tij filloi pasi më datë 19.01.2017, në fshatin Bulgarec – Korçë, dyshohet se ky shtetas për motive të dobëta, ka qëlluar dy herë (me armë gjahu) në drejtim të banesës së shtetasit V.F, 38 vjeç. Për pasojë ky i fundit ka marrë dëmtime trupore në pjesën e përparme të trupit dhe aktualisht ndodhet në Spitalin e Korçës, jashtë rrezikut për jetën.
Nga ana e Policisë po punohet intensivisht, për kapjen e autorit të dyshuar dhe vënien e tij përpara përgjegjësisë ligjore. Materialet i kaluan Prokurorisë të Rrethit Gjyqësor Korçë, për veprat penale: “Vrasja me paramendim, mbetur në tentativë”; “Prodhimi dhe mbajtja pa lejë e armëve të gjuetisë dhe sportive” parashikuar nga nenet 78,22 dhe 280 të Kodit Penal. (J.V/Shuplaka)
