Drejtori i përgjithshëm i Policisë së Kosovës, Rashit Qalaj, ka thënë se arrestimi i Astrit Mehmetit i njohur me nofkën “Llepota” është çështje orësh.
Sipas Qalajt, Mehmeti do të arrestohet në momentin kur ta kuptojnë vendndodhjen e tij.
“Në momentin e parë që kemi informacion ku është Astrit Mehmeti, do ta arrestojmë. Jemi duke punuar, besoj që do të arrestohet shumë shpejt. Është cështje e hetimeve dhe verifikimit të vendndodhjes, në momentin e parë që merret vesh vendndodhja e tij, nuk ka person që është i paprekshëm, është çështje orësh ose ditësh kur do të arrestohet” tha Qalaj për T7.
Drejtori i Policisë së Kosovës u shpreh se Mehmeti ka kryer një vepër të tmerrshme dhe për këtë do të japë përgjegjësi.
I pyetur nëse ka mundësi që të mos jetë në krye të Policisë me Qeverinë e re, Qalaj ka thënë se për të është e rëndësishme që Policia të funksionojë.
“Për mua është e rëndësishme që të funksionojë, por nuk është e rëndësishme kush do të jetë drejtor i përgjithshëm i Policisë”, ka thënë Qalaj.
Astrit Mehmeti i njohur me nofkën “Llepota”, është i dyshuar për plagosjen e katër rojeve të klubit të natës “Duplex” në Prishtinë.
Astrit Mehmeti, i cili është emër i njohur për Policinë e Kosovës, dyshohet ka hapur zjarr ndaj katër rojeve të sigurimit të klubit të natës që ndodhet në qendër të Prishtinës, teksa ka qenë i shoqëruar nga Kushtrim Krasniqi dhe Andi Pajaziti. Të dy shoqëruesit e tij, po ashtu, kanë qenë të armatosur.
Grupi i Astrit Mehmetit dhe rojet e sigurimit të “Duplex” janë gjuajtur me armë zjarri në hyrje të klubit të natës. Brenda disa sekondave janë dëgjuar të krisura armësh, të cilat kanë krijuar panik tek qytetarët e pranishëm.
