Plagosje me armë zjarri në Malësinë e Madhe, policia arreston 55-vjeçarin

Një plagosje me armë zjarri ka ndodhur sot në Malësinë e Madhe.

Një 55-vjeçar ka plagosur me pistoletë një 30-vjeçar pas një sherri për motive të dobëta. Ngjarja ka ndodhur në vendin e quajtur “Qafa e Bardalecit”, në fshatin Vermosh.

Menjëherë pas njoftimit, forcat e policisë kanë shkuar në vendngjarje. 55-vjeçari Gj.M ka tentuar të largohet sapo kanë ardhur efektivët e policisë, por veprimet policore bënë të mundur prangosjen e tij.

Ndërsa 30-vjeçari M.P është në spital nën kujdesin e mjekëve, jashtë rrezikut për jetën.

Njoftimi i Policisë:

Malësi e Madhe

Plagosi me armë zjarri një shtetas dhe tentoi të largohej nga vendi i ngjarjes, falë reagimit në kohë të shërbimeve të Policisë, kapet dhe vihet në pranga 55-vjeçari.

Shërbimet e Policisë, pas njoftimit se në vendin e quajtur “Qafa e Bardelecit”, në fshatin Vermosh, Malësi e Madhe, ishte plagosur me armë zjarri një shtetas, kanë shkuar menjëherë në këtë adresë. Nga veprimet e para hetimore rezultoi se pas një konflikti për motive të dobëta, shtetasi Gj. M. kishte plagosur me armë zjarri pistoletë, në dorë, shtetasin M. P., 30 vjeç, i cili ndodhet jashtë rrezikut për jetën. Gjithashtu, shtetasi Gj. M. ka dëmtuar automjetin e shtetasit D. Q. dhe e ka kanosur atë, pasi i ka ofruar ndihmë shtetasit të plagosur.

Falë veprimeve të shpejta operacionale, pas disa minutash ndjekjeje, shërbimet e Policisë kanë kapur dhe vënë në pranga autorin e dyshuar, shtetasin Gj. M., 55 vjeç.

Në vijim të veprimeve, nisi procedimi në gjendje të lirë për bashkëshorten e shtetasit Gj. M., shtetasen E. M., pasi ka qenë prezente gjatë konfliktit dhe ka kanosur shtetasin D. Q.

Materialet procedurale do t’i kalojnë Prokurorisë, për veprime të mëtejshme.