Një konflikt i çastit mes dy të rinjve në një shkollë të mesme në fshatin Baz ka përfunduar me plagosjen e një 17-vjeçari.
Ngjarja ka ndodhur sot, rreth orës 10:30, në ambientin sportiv të shkollës, ku gjatë një debati për motive të dobëta, shtetasi Donald Lepuri, 18 vjeç, dyshohet se ka goditur me një mjet prerës një 17-vjeçar. I plagosuri është dërguar menjëherë në spitalin e Matit, por për shkak të gjendjes së tij, është transportuar me helikopter drejt Spitalit të Traumës në Tiranë për trajtim më të specializuar.
Menjëherë pas ngjarjes, shërbimet e Komisariatit të Policisë Mat ndërmorën veprime të shpejta dhe bënë të mundur kapjen dhe shoqërimin e autorit të dyshuar në komisariat. Sipas hetimeve paraprake, rezulton se mes dy të rinjve nuk ka pasur konflikte të mëparshme.
Ndërkohë, policia ka sekuestruar edhe mjetin prerës që dyshohet se është përdorur në konflikt, duke e marrë si provë materiale.
Grupi hetimor, po vijon punën për të sqaruar të gjitha rrethanat dhe dinamikën e kësaj ngjarjeje.
