Ditën e djeshme nga Tirana kryeministri i Bullgarisë, Boyko Borissov vuri në siklet Edi Ramën teksa mes rreshtave kërkoi një aleancë kundër ndikimit të Turqisë në Ballkan.
Duke komentuar sot në studion e ‘’Fax News” këto deklarata ish-kreu i Shërbimit Informativ Ushtarak Ylli Zyla u shpreh se sipas tij, Turqia nuk përbën rrezik lidhur me sigurinë e Shqipërisë.
Ndërkohë një tjetër çështje ka dalë në dritë së fundi, mundësia e ngritjes së një kampi, ku në vendin tonë do të sillen persona që kanë qenë pjesë e ushtrisë së ISIS-it.
Sipas Zylës, kjo do të bënte një rrezik të madh për vendin tonë, pasi Shqipëria ka pak mundësi që të trajtojë rastet e terrorizmit, për shkak të mungesës së eksperiencës.
‘’Duke parë çështjet e sigurisë në Ballkan, del dhe një çështje tjetër për një qendër koordinimi që pret ushtarët që kanë marrë pjesë në luftën e ISIS. Këta janë persona që janë shumë të rrezikshëm.
Do të ishte mirë që ne të ishim një qendër koordinuese dhe jo grumbulluese, pasi Shqipëria është tashmë shumë e përfshirë me muxhahedinët.
Unë nuk do ta quaja me vend që të kishte një qendër grumbullimi për këta ushtarë, pasi ne vetë nuk jemi të stabilizuar. Çështja e terroristëve të ISIS do kërkonte një impenjim jo vetëm të vendeve të Ballkanit po edhe të SHBA-së.
Do të donte shumë kohë që kjo popullsi të integrohej, në mesin e tyre ka shumë persona që janë me rrezikshmëri shumë të lartë. Janë vërtet shumë të rrezikshëm, me një nivel shumë të lartë alarmi, duhet të mendohet mirë nga autoritetet.
SHISH dhe Policia e Shtetit kanë të dhëna lidhur me këtë popullsi, ku vetëm nga vendi ynë ka pasur 200 ushtarë, të cilët janë njerëz me një nivel shumë të ulët ekonomik. Në ISIS ka pasur një grumbullim dhe të personave nga organizata të tjera shumë të rrezikshme si AL-KAEDA.
Unë them pse mos të zgjidhet vetë Bullgaria, pasi është edhe në NATO edhe në BE. Nuk duhet të ishte kurrsesi Kosova pasi ka struktura shumë të brishta”, u shpreh Zyla.
(E.K/FAXWEB.AL)
Discussion about this post