Vijon të jetë shumë i nxehtë debati në Kuvend mes Edi Ramës dhe deputetes Rudina Hajdari, teksa kjo e fundit e ka ironizuar dukshëm kreun e qeverisë.
Gjithçka nisi me paralajmërimet e Ramës për ndërtimet paleje, ndërsa Hajdari iu përgjigj se po fliste njësoj sikur të vinte nga një planet tjetër, dhe sikur mos të kishte qenë asnjë ditë në pushtet.
Më tej Rama tha se deputetja nuk dinte të mbante një fjalim, dhe duhet të përmirësohej në këtë drejtim.
Por nuk vonoi as përgjigja ironike e Hajdarit, e cila tha se ndihej mirë që kryeministri po i përgjigjej, sa kohë që ai është mësuar të takojë vetëm njerëz të një rëndësie të madhe.
Pikërisht në momentet kur Hajdari po fliste për kushtet në spitale, kur tha se kishte blerë ngrohëse për pacientët, Rama po i ndërhynte nën zë nga pas kurrizit. Në këtë moment ka ndërhyrë dhe kreu i Kuvendit Gramoz Ruçi, që i kërkoi Ramës të mos ndërhynte.
“Faleminderit që na nderove me përgjigjen, se ti je lider global, dhe takohesh me njerëz të rëndësishëm. Është sforcim shumë i madh për ty se na mëson dhe si ti mbajmë fjalimet, na tregon edhe si të mendojmë e.
Zoti kryeministër se mbase edhe na keqkupton, se ti je mësuar vetëm me takime me zonjën Merkel, le të na gjykojnë shqiptarët nëse unë po them të vërtetën apo jo. Fola për spitalin, dhe pashë që nuk kishte rezistencë në spital, shkova dhe e bleva me lekët e mia, bleva dhe batanije për pacientët”, u shpreh Hajdari.
“Te raporti që the se jemi më të korruptuarit, është Shqipëria apo Maqedonia e Veriut më përpara, kjo do të thotë se kur mbytesh nga mllefi, urrejtja dhe padija, njerëzit nuk informohen dhe debati nuk bëhet me argumenta. Mënyra ime e të folurit nuk përmban as shpifje dhe as akuza, dhe as fjalor që e vë tjetrin në pozitën e fajtorit përpara drejtësisë”, deklaroi Rama.
(E.K/Faxweb.al)
