Sikundër edhe paralajmëruan, përfaqësues të Shoqërisë Civile kanë vijuar të qëndrojnë përpara Kuvendit edhe gjatë natës për të shprehur qëndrimin e tyre kundër ligjit për “Importin e Integruar të Mbetjeve”.
Në një deklaratë për mediat, përfaqësues të Shoqërisë Civile u shprehën se protesta do të vijojë deri sa të merret në konsideratë kërkesa drejtuar kryetarit të Kuvendit.
“Po hyjmë në ditën e dytë të protestës. Është qesharake se si ky ligj ka hyrë dhe ka dalë tri herë nga axhenda. Ne e gdhimë sot dhe do të vazhdojmë protestën. I kemi drejtuar një kërkesë kryetarit të Kuvendit dhe jemi në pritje. Jemi informuar se ky ligj nuk është diskutuar në komision ndaj dhe nuk do të jetë pjesë e rendit të ditës. Ne jemi këtu për t’i thënë “Jo plehrave”, u shpreh një prej protestuesve.
Protesta nisi ditën e djeshme pas bërjes të ditur të lajmit se ligji për “Importin e Integruar të Mbetjeve” nuk do të jetë pjesë e rendit të ditës në seancën e kësaj të enjte. (XH.A/SHUPLAKA)
Discussion about this post