“Plisat” e Prishtinës kanë bërë të qartë se nuk do të bojkotojnë Kombëtaren shqiptare edhe pse janë kundër veprimeve të policisë shqiptare apo edhe FSHF-së.
Grupimi i tifozëve ka qenë i pranishëm edhe sot në “Elbasan Arena”, duke mbajtur gjallë atmosferën në ndeshje me koret e tyre.
Ndërkaq, tifozët e zjarrtë treguan se do të vazhdonin t’u qëndronin besnikë ngjyrave kuqezi, ndërsa kishin një mesazh për grupimin “Dardanët” të cilët mbështetin Kosovën.
Këta të fundit shpalosën një parullë gjigande “Kosova është Kosovë”, para ndeshjes kundër Islandës.
Përgjigja e “Plisave” lë pak vend për interpretim. “Nuk ka këshillë më të keqe nga ajo që e shtyn njeriun të mohojë kombin e vet”, ishte parulla që shpalosi ky grupim sot në “Elbasan Arena”, duke iu kundërvënë “ndarjes” së Kosovës nga Shqipëria që kishin tentuar “Dardanët”. (M.D/ Shuplaka)
