“Po mbahet i arrestuar që të pranojë mandatin”, lirohet anëtari i PD-së Pandeli Tole

Pandeli Tole kandidati për deputet i PD-së në qarkun e Fierit është liruar ditën e sotme nga qelia e paraburgimit. Gjykata ka ndryshuar masën e sigurisë pas kërkesës së avokatit i cili ka kërkuar lirimin nga qelia të Toles.

Pandeli Tole akuzohet për pjesëmarrje në tubimin e paligjshëm në protestën e demokratëve fundjavën e kaluar, përkatësisht në datat 8 dhe 9 mars.

Ndërkohë nga Luan Baçi, kryetar i degës së PD-së në Fier është bërë jo vetëm një akuzë por gjithashtu dhe një denoncim ndaj policisë.

Baçi pretendon se policia e ka arrestuar qëllimisht kandidatin për deputet që të pranojnë mandatin pasi është pjesë e listave të PD-së.

Piro Soto është gjyqtari i cili liroi jo vetëm Pandeli Tole por edhe punonjësin e bashkisë Mallakastër Pëllumb Isufaj, i cili u akuzua për goditjen e efektivit të FSHN-së.

(s.a\faxweb.al)