Deputeti Lefter Maliqi, gjatë fjalës së tij në Parlament deklaroi se një shtet demokratik siguron jetën dhe pronën e qytetarëve të tij. Ai ka bërë një krahasim lidhur me përkushtimin e Ministrisë së Brendshme në luftën kundër krimit dhe korrupsionit, me kohën kur kjo ministri drejtohej nga Sokol Olldashi dhe mënyrës se si po luftohen këto fenomene tani.
“Në 2013 kur në pushtet ishte PD-ja dhe qeveria drejtohej nga Berisha, krijohej ideja se PD do të fitonte, por humbi, pasi në administratën e shtetit ishin vendosur njerëz jo të zotët. Që të ketë shtet, që të ketë siguri, shteti duhet të sigurojë jetën e qytetarëve dhe pronën e tyre. Ministër i suksesshmëm ka qenë i ndjeri Sokol Olldashi, sepse ai luftoi krimin dhe bandat. Nëse kjo maxhorancë do të luftojë krimet le dënojë krimet dhe të dënojë të fortët”.
Maliqi ka artikuluar edhe propozimin e bërë prej kohësh nga kreu demokrat, Lulzim Basha atë të vettingut në politikë. Sipas tij, politika është ajo që mbron të korruptuarit, kriminelët dhe të fortët.
“E kam thënë, vettingu duhet të fillojë nga politika sepse nga politika vjen gjithë ky korrupsion, sepse ajo mbron të fortët, kriminelët, të korruptuarit. Ai që sot është President i Republikës u ngujua në këtë Kuvend për shkak të sistemit zgjedhor. Unë e di se në matematikë 6×7 bëjnë 42 jo 49 siç mund ti dalë llogaria ndonjë ish-deputeti që ka qenë këtu. Ndaj unë mendoj se me sistemin zgjedhor aktual maxhoranca mund të blejë në çdo rreth nga një mandate”, tha Maliqi duke folur në kuadrin e projektligjit për Vettingun në Polici i cili u miratua me 79 vota pro, 6 kundër dhe 4 abstenim (lexo këtu).
Ndër ata që votuan abstenim ishte edhe ish ministri i Brendshëm Fatmir Xhafaj i cili gjatë diskutimeve në Kuvend ka kundërshtuar episode të rëndësishme të këtij projektligji.
Siç parashikojnë ndryshimet në Vetingun në Polici, verifikimi do të bëhet nga SHÇBA, e cilësuar nga Xhafaj si proces i pagarantuar (lexo këtu).
(F.GJ/FAXWEB.AL)
