‘’Po më dridhet trupi, pse kështu fitohet. Unë isha gjysmë metër larg Bashës. Nuk po shifja kam qenë keq, nuk po prisja që të dilte drita’’, këto kanë qenë disa nga fjalët e një prej grave të helmuara dje në Mitingun e Partisë Demokratike.
Duke dalë nga spitali ajo është shprehur se përgjatë gjithë natës ka ndjerë shqetësime të shumta dhe kur i është drejtuar spitalit nuk ka pasur as mjek.
Së bashku me bashkëshortin e saj ajo ka qenë pjesëmarrëse në Miting në momentet kur ka ndjerë dhe shqetësimet e para.
Ata thonë se kur kanë mbërritur në Spital iu kanë thënë ‘’mos e bëni kaq problem’’. Një ndër personat e prekur ka qenë dhe kryedemokrati Basha i cili është paraqitur në spitalin Francez rreth orës 3 të mëngjesit të sotëm.
Pas helmimit të qytetarëve ka reaguar dhe QSUT. Në njoftimin e saj thuhet se janë paraqitur në spital 76 persona, 5 prej të cilëve mbahen akoma nën vëzhgimin e mjekëve.
Njoftim për shtyp
Qendra Spitalore Universitare “Nënë Tereza” Tiranë, njofton se në Urgjencën e Spitalit Francez nga orët e para të mëngjesit të ditës së dielë deri në orën 11.00, janë paraqitur 76 qytetarë të cilët paraqisnin ankesat në vijim: skuqje të fytyrës dhe syve, lotim, kruarje të syve dhe rrufë. Të gjithë qytetarët referojnë se gjatë mbrëmjes së djeshme kanë marrë pjesë në aktivitetin e Partisë Demokratike.
Drejtoria e QSUT në bashkëpunim të ngushtë me Ministrinë e Shëndetësisë dhe stafin mjekësor të Shërbimeve të QSUT, morën menjëherë masat për trajtimin e këtyre pacientëve. Aktualisht, 5 pacientë po mbahen në observim në pavionin e Okulistikës nga një ekip multidisiplinar mjekësh specialistë. Gjendja e tyre shëndetësore paraqitet e mirë, pa komplikacione të rëndësishme.
Drejtoria e QSUT ka vënë në dispozicion të Institutit të Mjeksisë Ligjore të gjithë dokumentacionin e kërkuar për të sqaruar shkaqet e këtyre simptomave.
(E.K/SHUPLAKA)
Discussion about this post