Deputeti Partisë Demokratike, Aldo Bumçi, në studion e emisionit Opinion ka deklaruar se me drogë, dhunë dhe kërcënime nuk do ketë zgjedhje.
“Kryeministri Rama nuk vjen më në qeveri pasi nëse nuk reflekton, protesta do të radikalizohet deri në mosmbajtjen e zgjedhjeve”, u shpreh Bumçi.
Ai nënvizoi se Rama ose do t’i hapë rrugë qeverisë teknike ose nuk do ketë zgjedhje në vend.
“Nuk do ketë zgjedhje në Shqipëri, por do ketë vetëm zgjedhje të lira dhe të ndershme”, pohoi Bumçi.
Deputeti demokrat theksoi se shqiptarët le të votojnë përsëri Edi Ramën nëse e pëlqejnë, por ai është i detyruar që t’i hapë rrugën zgjedhjeve të lira dhe të ndershme.
Debati për qeveri teknike ka ardhur pas kërkesës së opozitës e cila që prej 18 shkurtit ka nënvizuar kushtin që kjo qeveri e re ta përgatisë vendin për zgjedhjet e reja.
Opozita prej 5 ditësh tashmë ka hyrë në një protestë të përqëndruar tek “Cadra e lirisë” e vendosur përballë kryeministrisë me kërksat për zgjedhje të lira dhe të ndershme dhe largimin e kryeministrit Rama e formimin e një qeverie teknike.
(M.D/ Shuplaka)
