Gazetari Agim Xhafka ngre dyshime mbi seriozitetin e nismës për mbledhjen e firmave për të mbështetur Vettingun.
Sipas Xhafkës, firmat i hedhin edhe njerëz të cilët kërkojnë të tallen, por pushteti nuk do t’ja dijë. Gazetari shkruan se gjatë ditës së sotme, njëri ka shkruar emrin “Gomari” dhe mbiemrin “Lopa”. Madje sipas tij, ky nuk është rasti i vetëm.
“Sot njëri nënshkroi emri: Gomar,mbiemri:Lopa. Po të hulumtohet do dalin xhevahire. Por pushtetit nuk i plas hiç. E tha Ai,karvani nuk ndalet. Duhet numri i firmave,jo saktësia,legjitimiteti a serioziteti.”, janë fjalët e Shafkës.
STATUSI I PLOTË I XHAFKËS
FIRMAT…
Ka disa ditë që në çadrat e vettingut ka plasur një gallatë e madhe. Shkojnë votojnë njerëzit me emra artistësh të hollivudit,me emra mbretërish, me pseudonime,bile dhe me emra kafshësh. Sot njëri nënshkroi emri: Gomar,mbiemri:Lopa. Po të hulumtohet do dalin xhevahire. Por pushtetit nuk i plas hiç. E tha Ai,karvani nuk ndalet. Duhet numri i firmave,jo saktësia,legjitimiteti a serioziteti.
Fiks para 25 vjetësh kur plasi krijimi i partive të reja,Leko,shoku im legjendar,punonte në një ministri. U mburr para ca politikanëve të rinj se krejt kolektivin prej 200 vetësh do e bënte simpatizant të partisë së tyre. Ata e quajtën budalla,tutkun,shitamendës,por Leko të nesërmen ua solli 200 firma ,bile dhe me numër letër njoftimi.
-Po si e bëre?- pyetën gjeniun.
-E lehtë fare,- ia nisi ai.- U thashë që në ministri do na vijnë plot ndihma në veshmbatje. Ndaj duhej një listë me emra mbiemra dhe me numër këmbe që këpucët të na vinin pa probleme. Kolonën e këmbës e vura në fund. Pasi firmosën të gjithë atë e preva me gërshërë.Ja,kaq.
Politikanët e partisë së re kësaj liste i vunë kokën Ministrisë së drejtësisë dhe kërkuan sipas ligjit të krijohej partia. Ajo u krijua dhe sot ka ca deputetë në kuvend.
Nuk besohet,por edhe pas 25 vjetësh jemi ku ishim. Tek firmat e Lekos dhe tek slogani idiot i pushtetit ç’më duhet mua se ç’bëj unë.. (D.D/Shuplaka)
