Policia e Shkodrës pasi ka grumbulluar informacione në lidhje me një grup kriminal që ka lidhje me organizimin, financimin dhe transportin me qëllim trafikimin e lëndëve narkotike drejt Malit të Zi, finalizoi me sukses operacionin policor “Bardhaj”, ku u kapën dhe u arrestuan në flagrancë shtetasit:
- Kristjan Pali 25 vjeç, banues në Shkodër
- Radovan Bulajic 42 vjeç, banues në Danilograd, Mali i Zi.
- Marko Rasovic 36 vjeç, banues në Nikshiq, Mali i Zi
Kapja dhe arrestimi i shtetasve të mësipërm u bë pasi nga kontrolli në brendësi të mjetit tip furgon “Volkswagen” me targa malazeze, i cili ishte futur në Shqipëri nëpërmjet PKK të Hanit të Hotit nga shtetasi R.B, u konstatuan 25 paketime polisteroli, 13 nga të cilat kishin brenda tyre lëndë narkotike të dyshuar “marijuanë” me peshë totale 151 kg, e cila u sekuestrua në cilësinë e provës materiale.
Policia sekuestroi në cilësinë e provës materiale, 2 automjete, 5 telefona celularë, 1 palë dylbi dhe një sasi eurosh.
2 nga të arrestuarit ishin banues në Malin e Zi.
Vijojnë hetimet për identifikimin dhe kapjen e personave të tjerë të përfshirë në këtë aktivitet kriminal.
Materialet procedurale i kaluan Prokurorisë pranë Gjykatës së Shkallës së Parë Shkodër, për veprat penale “Trafikimi i narkotikëve kryer në bashkëpunim i mbetur në tentativë” dhe “Prodhimi dhe shitja e narkotikëve kryer në bashkëpunim”, vepra këto të parashikuara nga nenet 283/a/2, 22 dhe 283/2 të Kodit Penal.
