Poezi dhe vizatime. Kjo është mënyra sesi shkrimtari Visar Zhiti, në dy vjetorin e ndarjes nga jeta të të birit zgjedh ta përkujtojë atë.
Botimi i librit vjen në gjuhën italiane, ku rrëfen dhimbjen e poetit për humbjen e djalit të tij të vetëm. Një libër i veçantë që dëshmon për një forcë poetike ku liria dhe dhimbja vazhdojnë të shprehin shqetësimët e kohës duke u vendosur në prezantimin e kritikut Ennio Grassi.
Libri hapet me poezinë: Ku është jeta? Dhe secila prej poezive shoqërohet me një vizatim të ri nga Atjoni, të panjohura më parë nga sytë e lexuesve.
Është një meditim mbi jetën e shkrimtarit, në raportet kur njeriun nuk e zë vetja, që kërkon kujtesën në përpjekjen e betejës për t’ia mposhtur trishtimin, dhimbjen dhe humbjen.
Kujtojmë se Atjoni, djali i vetëm i shkrimtarit Zhiti u nda nga jeta dy vite më parë për shkak të një aksidenti me motor në autostradën Tiranë-Durrës, duke lënë pas një dhimbje të madhe jo vetëm për familjarët po për të gjithë ata që kishin arritur ta njihnin sadopak.(E.K/ SHUPLAKA)
Discussion about this post