Nënkryetari i LRI-së dhe kandidati për deputet Klevi Pojana, i është kundërpërgjigjur ish-ministrit të Punëve të Brendshme Saimir Tahirit, pas sulmit të këtij të fundit ndaj LSI-së.
“Për LSI-në familja e çdo shqiptari është e shenjtë o Sa-i-keq dhe respekti ndaj familjes është një nga vektorët e forcës tonë!
Por meqë për ty familja është ajo tjetra dhe meqë ate tjetrën e kanë të tjerë në dorë, ty nuk të mbetet shumë për të bërë!”, reagon Pojana.
Kreu i Partisë Socialiste të Tiranës Saimir Tahiri gjatë një takimi me banorët tek Unaza e Re, deklaroi sot se PS është alternativa e vetme më 25 qershor ndërsa nuk ka lënë pa thumbuar as kreun e Kuvendit Ilir Meta.
“Partia Socialiste është alternativa e vetme në 25 qershor. Një eksperiencë si ajo e Ilir Metës nuk do doja kurrë ta kisha. I kemi dhënë LSI-së për 4 vjet hapësirën për të treguar se mund të bënte ndryshe. I kemi dhënë mundësinë LSI-së të tregonte se ka hallin e njerëzve, jo hallin e familjes. E fatkeqësisht kjo nuk ndodhi, ndaj ne shkojmë vetëm në zgjedhje. Kjo është arsyeja pse PS nuk do të fitojë sërish me ‘partiçka’”, deklaroi Tahiri.
Po kështu Tahiri ka theksuar se PS nuk është njëlloj as me LSI-në dhe as me PD-në.
“Nuk jemi njëlloj, nuk janë njëlloj ata që punojnë me ata që nuk punojnë. Luli e Saliu duan të legalizojnë partinë e vet, ne duam të legalizojmë çdo shtëpi të shqiptarëve”, tha Tahiri. Siç duket, kjo nuk i ka pëlqyer Pojanës, i cili nuk ka pritur gjatë që t’i kundërpërgjigjet. (D.D/Shuplaka)
