Mbrëmjen e djeshme 10 familje të komunitetit rom dhe egjiptian Policia Bashkiake e Lezhës i nxori nga palestra ku jetonin që prej se banesat e tyre janë dëmtuar nga tërmeti i 26 Nëntorit.
Ata pretendojnë se policia ka ushtruar dhunë ndaj tyre, ndërsa njëra nga banorët tha se kryebashkiaku kishte premtuar se vetëm kur të thoshte ai do të dilnin nga palestra ku ishin strehuar.
Ajo theksoi se fëmijët i kanë të sëmurë me temperaturë, ndërsa paralajmëroi se do të rikthehen nëpër banesat e tyre për të cilat shtoi, “nëse na zënë brenda, do të mbajë përgjegjësi tjetër kush”.
“Policia Bashkiake na nxori me dhunë me fëmijë, me burra, gra, një plakë që kemi aty, ‘dilni jashtë’ duke na përplasur nëpër krevate, fëmijët me vigon në dorë me temperaturë me serume. Jemi popull, jemi familjarë, nuk kemi moshë me u tall me na marrë Policia me dhunë. Ne na premtoi kryetari, na tha mos dilni jashtë pa ardhur unë. Kishim shpresë tek një banesë, por nuk ka përfunduar, s’ka drita dhe ujë. Do të kthehemi sërish në shtëpitë e pabanueshme. Ne nuk kemi moshë të qëndrojmë jashtë, kemi gjithë natën këtu në të fohtë kemi fëmijët me temperaturë. Do të shkojmë tek shtëpitë tona, nëse na zënë brenda, do mbajë përgjegjësi tjetër kush”, tha njëra nga banoret për Fax News.
(F.GJ/FAXWEB.AL)
