Paraditen e djeshme, një qytetar nga Durrësi njoftoi se një endacak i qytetit kishte ndërruar jetë si pasojë e të ftohtit. Viktima, i njohur nga qytetarët si Beni, rreth të 40-ave, është viktima e parë nga i ftohti dhe që nuk përbënte të sëmur kronik.
Pas lajmit për vdekjen e tij, nuk kanë munguar reagimet, ndër to dhe ai i Avokatit të Popullit, që tha se ishte një tragjedi e paralajmëruar. Nuk vonoi as reagimi i Policisë së Durrësit.
Në deklaratën e saj, policia ka konfirmuar ngjarjen dhe është shprehur se shtetasi A. S. 38 vjeç, ishte në listën e personave pa banesë dhe ishte kërkuar nga specialistët e zonës, të cilët nuk e kishin gjetur.
“Bëhet me dije se më datë 07.01.2017, rreth orës 07:30, në lagjen numër 17, është gjetur i vdekur shtetasi A.S. 38 vjeç, banues në Durrës. Nga këqyrja e kufomës nuk janë evidentuar shenja dhune.
Sipas policisë ai ishte identifikuar në listën e personave pa banesë dhe ishte kërkuar mbrëmë nga Specialistët e Zonës dhe Shërbimet e Rendit për ta sistemuar në ambjentet e policisë, por nuk është bërë e mundur gjetja e 38-vjeçarit.
Nga hetimet e kryera rezulton se vdekja ka ardhur për shkaqe natyrale. Materialet i kaluan Prokurorisë së Rrethit Gjyqësor Durrës për veprime të mëtejshme.”, bëhet me dije në deklaratën e policisë. (XH.A/SHUPLAKA)
Discussion about this post