Strukturat e Drejtorisë Vendore të Policisë Kukës kanë vijuar veprimtaritë e tyre në garantimin e rendit, sigurisë rrugore dhe luftën kundër krimit në të gjitha format e tij. Gjatë 24 orëve të fundit janë evidentuar dhe proceduar disa raste shkeljesh të ligjit.
1. Arrestim për drejtim automjeti pa leje drejtimi
Specialistët e Sektorit të Policisë Rrugore, në Njësinë e Sigurisë Rrugore të autostradës Tuneli i Kalimashit-Morinë, arrestuan në flagrancë shtetasin V. Gj., 20 vjeç, banues në Kosovë, pasi u kap duke drejtuar automjetin pa leje drejtimi.
2. Procedim penal për fshehje të të ardhurave
Specialistët për Hetimin e Krimit Ekonomik dhe Financiar referuan materialet në Prokurori dhe nisën procedimin në gjendje të lirë për shtetasin A. K., 31 vjeç, banues në Tiranë, me detyrë përgjegjës në një firmë të kontraktuar për nxjerrjen e mineralit të kromit. Në zonën e quajtur “Shtanë” u konstatuan dy kamionë të ngarkuar me krom, pa dokumentacion shoqërues, konkretisht faturë.
3. Procedim penal për dhunë psikologjike në familje
Specialistët për Hetimin e Krimeve në Komisariatin e Policisë Kukës referuan materialet në Prokurori për shtetasin S. M., 33 vjeç, banues në Kukës, i cili akuzohet se ka ushtruar dhunë psikologjike ndaj babait të tij, 65 vjeç. Viktima është pajisur me urdhër mbrojtjeje.
Materialet procedurale për të gjitha rastet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme.
Drejtoria Vendore e Policisë Kukës
