Konfliktet për lejimijn e Partizanit të luajë në ‘’Selman Stërmasi’’ duket se nuk kanë të sosur. Policia e Shtetit ka informuar Federatën Shqiptare të futbollit që ndeshja Partizani-Vllaznia të mos zhvillohet në stadiumin “Selman Stermasi’ në kryeqytet për shkak të frikës së incidenteve mes dy tifozërive.
Policia e Shtetit informon se nuk merr përsipër garantimin e sigurisë dhe mbarëvajtjen e takimit nëse ndeshja zhvillohet në këtë stadium. Vendimi i është bërë me dije dhe klubit të Partizanit dhe atij të Vllaznisë.
Të kuqtë kishin njoftuar se do të luajnë në “Selman Stërmasi” ndeshjen me Vllazninë të shtunën në orën 17:00.
Në bazë të marrëveshjes, Partizani do t’i paguajë Tiranës 3 milionë lekë të vjetër për çdo ndeshje të luajtur në “Selman Stërmasi”.
Ndërkohë, edhe vetë klubi i kuq e ka bërë zyrtare që takimi i javës së 20-të të Kategorisë Superiore do të zhvillohet në kryeqytet. Po pas kësaj nuk dihet fati i këtij takimi. Kujtojmv se dhe ë parë lejimi i Partizanit që të luajë në ”Selman Stërmasi” është pritur me mjaft kontestime nga ana e tifozëve të Tiranës.
“Nisur nga situata e krijuar ndërmjet palëve, kushteve jo të mira të stadiumit, të cilat janë favorizuese për tifozët për të shkaktuar incidente të ndryshme apo ngjarje të rënda që mund të dëmtojnë rëndë jetën e sportistëve, abritrave dhe vetë tifozëve, me qëllim shmangien e përplasjeve, kërkojmë nga të gjithë aktorët që përfshihen në këtë proces që të bëhet e mundur një zgjidhje tjetër, pasi Drejtoria Vendore e Policisë së Tiranës, për situatën e krijuar e ka të pamundur marrjen e masave për garantimin e rendit dhe sigurisë publike, para, gjatë dhe pas zhvillimit të ndeshjes”, mbyllet shkresa e firmosur nga drejtori i Policisë së Tiranës, Ervin Hodaj. (E.K/SHUPLAKA)
