Policia e Shtetit jep një njoftim të rëndësishëm për të gjithë shqiptarët që udhëtojnë drejt Greqisë ose kthehen prej saj.
”Nga kontaktet e vazhdueshme të mbajtura me palën greke, jemi informuar se për shkak të një greve të përgjithshme që do të zhvillohet nga Dogana Greke, duke filluar nga ora 07:00 e datës 09.11.2017 deri në orën 07:00 të datës 10.11.2017, nuk do të lejohet qarkullimi i automjeteve në të gjitha pikat e kalimit kufitar që lidhen me shtetin Grek dhe anasjelltas.
Do të lejohet vetëm lëvizja e këmbësorëve.”, njofton zyra e shtypit.
”Policia Kufitare kërkon mirëkuptimin e drejtuesve të automjeteve që kanë planifikuar të qarkullojnë me automjetet e tyre në drejtim të Greqisë, të anullojnë lëvizjet dhe të mos grumbullohen nëpër Pikat e Kalimit Kufitar duke sjellë konfuzion.”, sqaron më tej.
Në pikat kufitare të kalimit në Greqi së fundmi u vunë re vonesa duke nervozuar shqiptarët për orë me radhë. (V.G/FAXWEB)
