Policia eTiranës ka referuar në Prokurori procedim penal për kryetarin e Partisë Demokratike Lulzim Basha. Kjo ndodh një ditë pasi kryedemokrati Basha u bëri thirrje protestuesve të reagojnë dhunshëm nëse preken nga qeveria.
Një ditë më parë, kryetari i Partisë Demokratike, Lulzim Basha, u bëri thirrje protestuesve që të reagojnë dhunshëm ndaj padrejtësive. “Shpojuani gomat e makinës, thyejuani xhamat, atyre që ju ndëshkojnë pa të drejtë. Kush luan me popullin t’i bëjë llogaritë mirë, se ndryshe vala popullore do t’i fshijë nga zyrat”, u shpreh ndër të tjera kreu i PD-së.
Mbi këtë deklaratë, Policia e Tiranës bën të ditur se Basha rrezikon dënim me gjobë ose dënim me 3 vite burg.
Detaje nga Policia e Tiranës:
Drejtoria Vendore e Policisë Tiranë, referoi materialet proceduriale Prokurorisë pranë Gjykatës së Shkallës së Parë Tiranë në ngarkim të shtetasit Lulzim Basha, Kryetar i Partisë Demokrate për thirrje publike për veprime të dhunshme.
Në datë 24 shkurt 2017, rreth orës 12:00, në Bulevardin “Dëshmorët e Kombit”, në çadrën e ngritur, z.Basha, në fjalën e transmetuar drejtpërdrejt në media, ka bërë thirrje nxitëse ndaj qytetarëve të reagojnë dhunshëm ndaj institucioneve shtetërore.
“Doni luftë, luftë do të ketë. Shpojuani gomat e makinës, thyejuani xhamat… … ora t’i marrim zvarrë në këtë shesh…”, citohet Basha.
Materialet proceduriale iu referuan Prokurorisë pranë Gjykatës së Shkallës së Parë Tiranë, për veprën penale “Thirrje publike për veprime të dhunshme”, parashikuar nga neni 223 i Kodit Penal, i cili parashikon “Thirrjet e bëra publikisht për të kryer vepra të dhunshme kundër rendit kushtetues, dënohen me gjobë ose me burgim gjer në tre vjet”.
(XH.A/SHUPLAKA)
