Ka pasur një protestë sërish sot për ndërtimin e HEC-eve në zonën e Valbonës. Policia ka ndërhyrë duke i shpërndarë protestuesit.
Në studion e ‘’Fax News” aktivistët Arben Kola dhe Dorisa Mhilli, u shprehën se protesta do të vijojë.
Ata thanë se shkatërrimi që po i bëhet Valbonës, do të sjellë uljen e numrit të turistëve që vizitojnë parkun.
‘’Investimi për zhvillimin e parkut në Valbonë do të ishte një pasuri kombëtare dhe jo një pasuri e oligarkëve. Të gjithë ata që janë fajtorë, unë po e quaj krim, duhet që të ndëshkohen”, u shpreh Mhilli.
‘’Ka pasur rreth 120 mijë turistë që e kanë vizituar Valbonën vitin e kaluar, nëse ndërtimet ndalohen, ky numër do të shtohet edhe më shumë.
Turistët janë në kërkim të një mjedisi të egër, pasi janë të lodhur nga betonizimi. Ta lëmë Valbonën ashtu siç është, të kenë edhe mundësi banorët që të qëndrojnë më aty.
Ne nuk duam braktisje të Shqipërisë. Atë që nuk kuptoj nga ana e qeverisë që bën thirrje për turizmin. Nuk mund të ketë dy gjëra së bashku.
Kam një thirrje dhe për ministrin Klosi, je apo jo në mbrojtje të parqeve?! Mos luaj një lojë të dyfishtë, ashtu siç kanë bërë edhe politikanë të tjerë.
Ka pasur kërcënime nga ana e kompanive, për ne që jemi pjesë e aktiviteteve kundër ndërtimeve. Këta nuk na kanë marrë edhe aq seriozisht, pasi kërcënimet edhe mund të shtohen”, u shpreh Kola.
Nga ana tjetër protesta e sotme nuk është lejuar që të zhvillohet deri në fund, edhe pse aktivistët thonë se kishin marrë leje.
(E.K/FAXWEB)
Discussion about this post