Policia ultimatum protestuesve: 5 minuta afat të shpërndaheni ose do të ndërhyjmë

Policia e Shtetit u ka dhënë ultimatum protestuesve të shpërndahen brenda 5 minutave ose do të shpërndahen forcërisht. Pas përplasjes përballë Parlamentit dhe marshimit në bulevard Policia ka lëshuar ultimatumin të cilëve u ka kërkuar të shpërndahen dhe të ndërpresin veprimet e jashtëligjshme ose do të ndërhyjë me forcë.

Thirrja i është drejtuar Gazmend Bardhit si organizues i kësaj proteste duke kërkuar moscënimin e uniformave blu.

“Në rast se për 5 minuta nuk do të ndërprisni veprimet e kundraligjshme turma do të shpërndahet forcërisht nga Policia e Shtetit e cila do të përdorë forcën dhe mjetet e saj, sipas ligjit”, thuhet në njoftimin e policisë.

Njofimi i plote:
TË NDERUAR QYTETARË!
 Nga protuestuesit po kryhen akte të rënda dhune ndaj punonjësve të policisë, po cënohet rendi publik dhe siguria e qytetarëve.
I NDERUAR ZOTI GAZMEND BARDHI !
 Si organizator i tubimit , ju lutemi kërkoni nga protestuesit të ruajnë qetësinë.
 Protestuesit duhet të ndërpresin veprimet e dhunshme dhe të shpërndahen.
 Ju bëjmë thirrje të distancoheni nga këto veprime të dhunshme
 Veprimet e protestuesve janë të kundërligjshme dhe të dënueshme nga ligji penal.
 Në rast se për 5 minuta nuk do të ndërprisni veprimet e kundraligjshme turma do të shpërndahet forcërisht nga Policia e Shtetit e cila do të përdorë forcën dhe mjetet e saj, sipas ligjit.

Opozita ka thirrur një protestë masive ku kërkohet dorëheqja e kryeministrit Rama, ngritja e një qeverie teknike si dhe mbajtja e zgjedhjeve të parakohshme. Liderët e opozitës prej disa javësh janë në protesta të vazhdueshme kundër qeverisë Rama 2 pasi sipas tyre vullneti i votuesve në zgjedhjet e 2017-s është deformuar nga shitblerja e votës. Korrupsioni dhe trafiku i drogës gjithashtu sipas opozitës po e çon vendin në degradim ekonomik dhe social.