Presidenti i Kukësit, Safet Gjici, duket që nuk do ta lërë pas dore klubin e kukësit edhe pse është angazhuar në politikë.
Ai në një intervistë për “Supersport” ka deklaruar se nuk e ka larguar asnjëherë vëmendjen nga ekipi i Kukësit dhe se së shpejti do ketë përforcime të reja në ekip për të përballuar me sukses Europën.
“Edhe pse ishim në fushatë, kam qenë në kontakte me menaxherin e klubit për disa afrime që ta forconin ekipin në disa reparte që stafi teknik i kërkonte. Jam në dijeni të disa afrimeve të mira, natyrisht presim edhe disa të tjera, por mendoj se ekipi deri diku është kompletuar për të përballuar një ekip si Sherifi i Tiraspolit, që është një ekip i mirë, me investitorë shumë të fuqishëm. Besoj shumë se ekipi do të japë rezultat maksimal, rezultat pozitiv dhe objektivi ynë është të kalojmë këtë tur. Sherifi është një klub shumë më i organizuar, por ne kemi treguar se kemi kaluar ekipe më të forta. Unë besoj te stafi dhe te lojtarët për të marrë një rezultat pozitiv”, u shpreh Gjici.
Gjici ka bërë dhe një premtim special për tifozët. Ai ka deklaruar se do të ndërtojë stadiumin e kukësit për t’i luajtur ndeshjet e kompeticionit Europian në shtëpi.
“U kam premtuar kuksianeve se tanimë do bëjmë një stadium për të luajtur në Europë në shtëpi. Ajo do ishte dhurata më e mirë për tifozët. Kemi nisur bisedimet me federatën, është edhe një premtim edhe i kryeministrit Rama për ta bërë stadiumin e Kukësit. Do ngremë edhe akademinë dhe do bëjmë investime të mëdha, si në infrastrukturë, si dhe në klub. Do marrim një drejtor sportiv, ndoshta të huaj”, tha Gjici. (B.H/Shuplaka)
Discussion about this post