Portieri i Skëndërbeut Shehi: Pas humbjes me Partizanin, jemi duke luajtur me shumë grintë

Pas fitores së katërt radhazi në kampionat, Skënderbeu vijon të mbetet i ngjitur pas dy kryesuesve të kampionatit, Partizanit dhe Kukësit me 3 pikë diferencë. Sipas kapitenit bardhekuq, portierit Orges Shehi, në këto momente Skënderbeu duhet të shohë vetëm ndeshjet që ka përpara pa bërë asnjë llogari. Në një prononcim të dhënë për “Panorama Sport”, numri një i ekipit kampion në fuqi flet qartë për objektivin sezonal:

FITORJA E FUNDIT

“Në një moment të tillë çdo ndeshje ka rëndësi dhe çdo tri pikësh është jetik. Me këtë të fundit, ne i japim mundësi vetes të jemi në rrugë për të përmbushur objektivat”.

PARTIZANI-KUKËSI

“Është një përballje mes vendit të parë dhe të dytë, ku natyrisht që do të jetë një ndeshje e fortë, por nuk jam i mendimit se ky takim do të ketë ndikim te Skënderbeu për titullin. Ne duhet të bëjmë kampionatin tonë dhe më pas të mendojmë se si dalin rivalët tanë për titull. Asgjë nuk ka rëndësi nëse Skënderbeu nuk fiton ndeshjet e veta. Natyrisht që jemi të interesuar të ndalen kundërshtarët tanë, por sigurisht që asgjë nuk ka vlerë nëse nuk fitojmë ndaj Vllaznisë”.

“TOLERIMI” I LUFTËTARIT

“Është e paimagjinueshme që unë të merrem me të tilla akuza apo fjalë kafenesh. Nuk dua të komentoj asgjë për sa u përket atyre. Të gjithë e panë ndeshjen dhe ne e fituam me meritë maksimale atë takim. Për më tepër duhet të theksoj se në katër takime, Luftëtari nuk na ka shënuar asnjë gol. Ne do të bëjmë punën tonë dhe do të ndjekim deri në fund objektivin titull që na ka vendosur klubi”.

VLLAZNIA

“Do të jetë një ndeshje e fortë edhe për vetë faktin se Vllaznia është një ekip cilësor dhe i disiplinuar në fushë. Për më tepër, të vështirë e bën fakti që Vllaznia është në garë për një vend në Europë. Statistikat pro? Unë e përsëris që është një ndeshje mjaft e fortë dhe nëse nuk jemi të përqendruar dhe s’e respektojmë kundërshtarin, do të na kthehet në një bumerang”.

SKËNDERBEU IDEAL

“Skënderbeu, sidomos pas ndeshjes me Partizanin, ka bërë atë hapin cilësor dhe po luan me shumë grintë, forcë dhe besim te fitorja dhe tek objektivi final. Nuk dua të ndaj meritat, pasi fitojmë të gjithë si grup dhe humbasim të gjithë si grup. Pa dyshim që Daja po bën një punë të mirë me Skënderbeun”.