Zgjedhjet e 11 dhjetorit në Maqedoni, të cilat nuk nxorrën asnjë parti apo koalicion fitues, kanë tërhequr edhe vëmëndjen e Tiranës zyrtare. Pas ftesës së kryeministrit Edi Rama për krerët e partive shqiptare në Shkup, sot ka qenë kryetari i Kuvendit Ilir Meta, i cili është shprehur se mbështet integrimin në BE dhe NATO të Maqedonisë dhe se mbështet stabilitetin e saj.
“Më i rëndësishëm se çfardo lloj rezultati është stabiliteti i Maqedonisë, është zhbllokimi i kësaj krize institucionale përmes zgjedhjeve të fundit, që fatmirësisht u zhvilluan në një klimë pozitive dhe demokratike gjë që u vlerësua edhe nga ndërkombëtarët të cilën e kanë mbështetur Maqedoninë për të dalë nga kjo krizë. Për të ardhmen është e rëndësishme që ky proces të përfundojë në tërësinë e tij në mënyrën më demokratike. Me e rëndësishme është që Maqedonia të ecë përpara në zgjidhjen e problemit të emrit dhe përparimit të proceseve integruese. Ajo që është e rëndësishme është që të drejtat e shqiptarëve të shënojnë një progres të dukshëm përmes një zbatimi sa më real edhe të vetë marrëveshjes së Ohrit”, tha Meta në fjalën e tij.
Deklarata e Metës erdhi pas takimit me kreun e BDI-së, Ali Ahmeti.
