Stefano Addeo, mësuesi që shkroi në rrjetet sociale fjalë të rënda duke i uruar vdekjen vajzës së kryeministres italiane, Giorgia Meloni, ka dhënë një intervistë për La Repubblica, ku tregon se është penduar për atë që bëri. Ai i kërkon falje kryeministres dhe e quan atë që ndodhi një “gabim” që erdhi nga përdorimi i ChatGPT.
“Jo unë e shkrova, por ishte inteligjenca artificiale. Të premten pashë në televizor që qeveria nuk po merrte distancë nga lufta në Izrael, kështu që i kërkova ChatGPT-t të më krijonte një mesazh kundër Melonit. Dhe dolën ato fjalë të tmerrshme. I publikova. Kjo është e vërteta, tani nuk di çfarë të bëj…” – tha ai.
Intervista për La Repubblica:
“Kam bërë një gabim të madh. Postimi ishte i së premtes në mbrëmje, ndërsa të shtunën në mëngjes e fshiva.”
Në postime të tjera, ju u dëshironit të njëjtin fat fëmijëve të Tajanit dhe Salvinit, si palestinezëve…
“Ato janë ilustrime që i gjej dhe i shpërndaj, nuk më kujtohet të kem shtuar ndonjë koment personal. Por tani po keqpërdoret, edhe njerëzit e pafajshëm bëjnë gabime.”
Si ndodhi që formulove mendime të tilla?
“Nuk isha unë, ishte inteligjenca artificiale. Të premten pashë në televizor që qeveria nuk po distancohej nga lufta në Izrael; i kërkova ChatGPT që të më shkruante një mesazh kundër Melonit. Dhe doli ajo gjë e tmerrshme. E postova. Kjo ndodhi, tani nuk di më çfarë të bëj.”
Nuk menduat fare para se ta publikoni?
“Mendja ime ndoshta nuk do ta kishte krijuar atë mesazh. Kur e lexova për një moment thashë: o Zot, çfarë ligësie… Por të premten në mbrëmje kisha planifikuar të postoja diçka, dhe të shtunën në mëngjes kuptova se nuk mund të vazhdoja normalisht me fëmijët. Më duhej më shumë kohë për ta përballuar.”
Po flasim për një feminicid të një vajze të re…
“Natyrisht, më vjen shumë keq për atë vajzë. ChatGPT doli më keqdashëse sesa mendoja. Unë jam katolik, mbroj të drejtat e kafshëve, ndihmoj fëmijë në spitale, jam vegjetarian. Vlerat e mia janë shumë larg asaj që shkrova. Jam i majtë, por kjo nuk justifikon mesazhe të tilla. Duhet të fshija të gjitha rrjetet, njerëzit duan të më sulmojnë. Po përballem me pasoja shumë të rënda.”
Çfarë lloj pasojash?
“Të dielën dola me qenin, më njohën nga një makinë dhe më ndoqën. M’u desh të hyj me vrap në shtëpi.”
Keni denoncuar ndonjë gjë?
“Jam i mbyllur në shtëpi, pres që të më shoqërojë ndonjë person i afërt. Më hedhin domate në derë.”
Ju jeni mësues. Si do t’u shpjegoni nxënësve këtë?
“Nga nxënësit kam mbështetje: më njohin dhe më duan. Kam ndjekur kurse kundër bullizmit online dhe mendoja se isha imun ndaj rrjeteve sociale, por kjo doli jashtë kontrollit. Më vjen keq që profesioni im është vënë në pikëpyetje; ministria ka nisur hetime, ndërsa drejtoresha ime nuk më mbështet. Shpresoj që të ketë mirëkuptim.”
A mund të ketë pasoja ligjore?
“Më shqetëson më shumë siguria ime personale.”
Keni fëmijë?
“Jo, jetoj me nënën time 90-vjeçare që kujdesem për të. Dy vite më parë, në një zjarr në shtëpi, humbi babai im, ishte një tragjedi e madhe.”
Nëse do ta takonit kryeministren Meloni, çfarë do t’i thoshit?
“Do ta përqafoja, do i kërkoja falje dhe do qaja me të. Vajzës së saj i uroj të gjitha të mirat dhe do t’i thosha të jetë shumë e kujdesshme me rrjetet sociale.”
