Është vendosur që të rihapet çështja gjyqësore për vrasjen e ish-liderit demokrat Azem Hajdari.
Gjykata e Apelit ka pranuar kërkesën e Izet Haxhisë, dhe çështja do të kthehet për gjykim në gjykatën e shkallës së parë.
Me këtë vendim që u mor sot, dosja ‘Hajdari’ fillon nga zero me një tjetër trupë gjykuese dhe gjyqtar.
Pas vendimit Avokati i Izet Haxhisë, Bashkim Nikolla u shpreh se: Është e drejta jonë për të paraqitur provat. Çështja ka qënë e montuar, ka patur ndikim politik. Në krye të listës për tu marrë si dëshmitar është Berisha.
Kemi siguruar të drejtën të dëgjohemi. Provat janë materiale, tabulate dhe dëshmitarë. Me të gjitha këto ne do të provojmë pafajësinë që i është faturuar të përfaqësuarit prej meje.
Izet Haxhia ka deklaruar më herët se ka një numër provash të reja që do t’i paraqesë në gjykatë nëse rigjykohet.
Avokati Nikolla ka deklaruar më herët se në dosjen hetimore mungojnë disa prova që supozohet të ishin, përshembull ditari i ish-ministrit të Brendshëm, Perikli Teta, si një provë e marrë në atë kohë me vendim gjykate, por që nuk gjendet në dosjen e vrasjes së Azem Hajdarit.
Avokati përmendi edhe dëshminë e shumë deputetëve dhe figurave publike, që kanë dijeni dhe mund të japin të dhëna të vlefshme për zbardhjen e asaj që quhet “vrasja e shekullit”.
(E.K/FAXWEB.AL)
Discussion about this post