Në një lidhje të drejtpërdrejtë nga New York për Fax News, avokati dhe analisti i çështjeve ndërkombëtare, Altin Nonaj, komentoi zhvillimet më të fundit nga politika amerikane dhe ajo ndërkombëtare, me fokus te takimi i shumëpërfolur mes Donald Trump dhe kryeministrit izraelit Benjamin Netanyahu, si dhe për tarifat e reja doganore që SHBA vendosi ndaj Brazilit.
Nonaj e cilësoi takimin Trump–Netanyahu si një lëvizje të qartë presioni politik nga ana e ish-presidentit amerikan ndaj udhëheqjes izraelite. Ai deklaroi se qëllimi kryesor i këtij presioni është arritja e një marrëveshjeje me Hamasin dhe sigurimi i një armëpushimi në Rripin e Gazës.
“Trump po ushtron presion të madh mbi Netanyahu-n për të çuar përpara një marrëveshje me Hamasin dhe për të garantuar një armëpushim të qëndrueshëm në Gaza,” – tha Nonaj.
Sipas tij, edhe pse SHBA ka qenë tradicionalisht aleat i fortë i Izraelit, aktualisht brenda shoqërisë amerikane ekziston një pakënaqësi e madhe ndaj mënyrës se si Netanyahu po e menaxhon konfliktin.
“Shoqëria amerikane është gjithnjë e më kritike ndaj politikave të Netanyahu-t. Dhe kjo reflektohet edhe në lëvizjet politike në Washington,” – shtoi Nonaj.
Avokati theksoi se Izraeli mbetet vendi ku Shtetet e Bashkuara kanë bërë investimet më të mëdha strategjike dhe ushtarake në Lindjen e Mesme, dhe për këtë arsye “Tel Avivi nuk mund të injorojë presionin amerikan”.
Nonaj foli për vendimin e Trump për të vendosur një tarifë 50% mbi mallrat e importuara nga Brazili, një nga ekonomitë më të mëdha në botë dhe një konkurrent i fuqishëm në tregjet ndërkombëtare.
“Brazilin nuk mund ta anashkalosh. Është një ekonomi e madhe dhe e rëndësishme në skenën globale. Trump kërkon ta kontrollojë ndikimin ekonomik të Brazilit përmes tarifave të larta,” – u shpreh ai.
Sipas Nonaj, kjo lëvizje është pjesë e një strategjie të dyfishtë të Trump: presion tregtar ndaj vendeve që i sheh si konkurrentë dhe një përpjekje për të mbushur boshllëkun në buxhetin federal.
“SHBA përballet me një deficit të madh buxhetor, dhe tarifat po përdoren si një mjet për të rritur të ardhurat dhe për të forcuar kontrollin mbi ekonomitë që sfidojnë tregjet amerikane,” – theksoi Nonaj.
