‘Premtoi’ arrestimin e peshqve të mëdhenj, flet ambasadori Lu: Policia po përpiqet të kapë Balilin

Ambasadori i SHBA-ve, Donald Lu, në vjeshtën e vitit 2017 paralajmëroi për efektet e para të Reformës në Drejtësi në Janar të 2018-ës.

Deklarata e Lu-së ngjalli debat në skenën politike shqiptare.

Në një intervistë për gazetën “Dita”, ambasadori Lu i pyetur për termin ‘peshqit e mëdhenj’ ka thënë se rezultatet janë të pritshme pasi gjyqi i Emiljano Shullazit do përfundojë.

Lu ka thënë gjithashtu se Policia e Shtetit ka rritur përpjekjet për kapjen  e ‘Escobarit të Ballkanit’, Klement Balili.

“Ku janë peshqit e mëdhenj të premtuar?  Këtë pyetje i bëj çdo zyrtari të qeverisë që takoj. Shqiptarët kanë parë njëfarë përparimi por jo rezultatet e mëdha që presin. Gjyqi i Emiljano Shullazit është drejt fundit. Në dhjetor, Gjykata e Lartë ra dakord të shqyrtojë lirimin para kohe të Lul Berishës nga burgu. Policia ka rritur në mënyrë dramatike përpjekjet për të kapur Klement Balilin.

Por nuk duam premtime, duam rezultate. Njerëz seriozë në qeveri dhe në opozitë kërkojnë rezultate. Kjo përpjekje ka mbështetjen e plotë të prokurorëve federalë të SHBA dhe agjencive ligjzbatuese amerikane. Dhe ka mbështetjen time të plotë.”-ka thënë Lu.

 (F.G/Faxweb)