Ministri i Mjedisit Blendi Klosi ka konfirmuar vendimin e mëparshëm të qeverisë për të ndaluar importin e makinave që janë prodhuar para dhjetë viteve.
Sipas tij kjo bëhet për të shmangur nivelin e lartë të ndotjes që shkaktojnë makinat e prodhuara shumë vite më herët.
Doganat do të jenë të detyruara që të zbatojnë vendimin, edhe pse duhet thënë se shqiptarët iu drejtohen makinave të përdorura për shkak se ato të rejat kanë kosto të papërballueshme.
“Do ndalojmë importimin e makinave, që janë më të vjetra se 10 vite nga data e prodhimit. Makinat e prodhuara para vitit 2009 nuk do lejohen të hyjnë në Shqipëri.
Kjo bëhet për pastrimin e ajrit dhe reduktimin e ajrit të ndotur. Një makinë e vjetër harxhon 4 herë më shumë se një makinë e re dhe kjo nuk është në favor të qytetarëve, përveç faktit që ndotin dhe ambientin”, tha ministri Klosi.
Drafti i qeverisë parashikohet të ishte në fuqi tashmë, por për arsye akoma të paqarta është shtyrë për këtë 6 mujor. Dokumenti parashikon se do të lejohet të importohen në Republikën e Shqipërisë vetëm mjetet motorike të kategorisë M dhe N, të reja dhe të përdorura, që plotësojnë standardet “Euro 5” të shkarkimeve në ajër”.
Në kategorinë e makinave që plotë- sojnë standardin “Euro 5” përfshihen makinat e prodhuara pas vitit 2009.
Në draft përcaktohet që do të jetë administrata doganore, që do të kontrollojë importin e makinave dhe në rast se ato nuk plotësojnë standardin “Euro 5”, do të ndalohen të importohen. Nga doganat do të kontrollohen dokumentacioni i mjetit, duke përfshirë specifikat teknike të tipit të mjetit.
(E.K/FAXWEB)
