Presidenti i FSHF-së, Armand Duka, “driblon” aleancat e shumëpërfolura së fundmi, duke thënë se po bëhet një kampionat shumë i bukur.
Në një intervistë televizive gjatë emisionit “Zona Gol” në “Supersport”, Duka ka vlerësuar garën. Kreu i institucionit të futbollit e ka bërë këtë jo thjesht në mbrojtje të produktit, porse, sipas tij, askush nuk mund të përcaktojë në këtë moment verdiktet e kampionatit dhe Kupës së Shqipërisë.
I pyetur rreth aleancës së mundshme mes Tiranës dhe Kukësit, presidenti i FSHF-së nuk foli specifikisht, por theksoi se ky kampionat po prodhon emocione çdo javë. “Për mua, kampionati është shumë i bukur. Mendoj se është i tillë, pasi askush në këtë moment nuk mund të thotë se kush del kampion, kush do të marrë pjesë në Evropë apo kush do të dalë nga kategoria.
Nuk ka asnjë ekip që e ka të siguruar pozicionin që ka aktualisht në renditje. Kampionati po prodhon emocion në çdo ndeshje dhe në çdo javë, kështu që uroj që të jetë kështu deri në fund”, është shprehur numri një i futbollit. (E.K/SHUPLAKA)
