Teksa pritet që parlamenti ta zgjedhë presidentin e ri të Republikës së Shqipërisë në harkun kohor 28 mars deri më 2 maj në pesë raunde, ka nisur “skicimi” i Kreut të Lartë të Shtetit që do jetë i 10-ti në historikun e presidentëve të Shqipërisë.
Mazhoranca ka nisur të hedhë në mendje dhe në letër se cilët mund të jenë kandidatura e mundshme për të qenë presidenti i radhës. I ftuar në emisionin “Channel One”, për të bërë analizën 4-vjeçare të punës së tij, ministri për Çështjet Vendore Bledi Çuçi, me shumë siguri deklaroi se nuk ka asnjë shans që kandidati të jetë një emër i dalë nga Partia Demokratike.
“Nuk mund të them ende se cilët do jenë kandidatët, por jam i sigurtë se vetëm nga PD nuk mund ta dalë presidenti që do të zgjidhet së shpejti”, duke shuar kështu zërat e një kompromisi me kundërshtarët politikë të mazhorancës.
Ai shtoi se Partia Soscialiste nuk mund të lejojë që presidenti të zgjidhet si figurë e dalë nga PD, teksa shtoi se këtë shans nuk e ka as presidenti aktual Bujar Nishani për të marrë një mandat të dytë.
“Kurrsesi Nishani nuk mund të jetë president në një mandat të dytë”, u shpreh Çuçi.
Deri tani, kandidatë të mundshëm për president të republikës kondsiderohen Ilir Meta, Mimi Kodheli dhe Valentina Leskaj. Por asnjë prej tyre nuk mund të quhet si kandidaturë zyrtare.
Në historinë e vendit, nga Ahmet Zogu te Bujar Nishani kanë qenë në total 9 presidentë. Pas rrëzimit të sistemit komunist deri më sot, nga 6 të zgjedhur, 4 prej tyre kanë ardhur si kandidatura nga e djathta (Sali Berisha, Alfred Moisiu, Bamir Topi, Bujar Nishani) dhe 2 kanë qenë kandidatura të së majtës (Ramiz Alia, Rexhep Meidani). Ndërkaq, presidenti i 10-të që pritet të zgjidhet, me shumë mundësi do të jetë një figurë e dalë nga e majta. (XH.A/SHUPLAKA)
