Barazimi me Kukësit dhe Vllaznisë duket se nuk i ka pëlqyer aspak Presidentit të Kukësit, Safet Gjici. Më shumë sesa për lojën e zhvilluar Gjici ka kritika ndaj arbitrit Andi Koçi, të cilin klubi i tij e shpalli “non grata” pas ndeshjes së djeshme kundër Vllaznisë.
Sipas Gjicit ndoshta gjyqtari ishte i vendosur për të ndihmuar Partizanin me gjykimin e tij.
“Kukësi prej 28 javësh nuk njeh humbje por ja që doli një gjyqtar që na prishi punë. Vetëm se ka diçka, që ndërhyrja e këtyre arbitrave, nuk dua ta paragjykoj, por ishte një dënim që i dha Kukësit në fushën e tij, në një fushë ku ka bërë investime për të fituar titullin.
Ne kemi bërë një ankimim për gjyqtarin në këtë rast, por unë besoj se raste të tilla nuk është gabim por faji i rëndë që duhet ndëshkuar, sepse kishte fushëpamje për të dhënë penallti në minutën e 20-të. Ne kemi kërkuar të bëjmë kallëzim penal për këtë arbitër, gjykimet e tij janë nga më të çuditshmet, ndoshta ka ardhur për të ndihmuar Partizanin. Unë s’e di”, tha ai në “Gol pas Goli”.
“Zoti Jemini, e mbylli ndeshjen brenda 15 minutash, Partizani mori fitoren brenda 15 minutash. Ndërsa standard tjetër në Kukës, një penallti e pastër që s’mund të thuhet ishte 60 me 40 por 100 për qind e pastër. Dhe nëse anësori bën gabim, kryesorit nuk i lejohet sepse na hoqi dy pikë, sepse po të ishte bërë ajo penallti gol mund të kishim rezultat tjetër. Ekipi i Vllaznisë kishte ardhur me objektiv për të marrë pikë”, vijoi Gjici duke aluduar se tashmë po ndihmohej skuadra e Partizanit.
“Nuk është dramë barazimi në Kukës, jo për fajin tonë, por për dikë tjetër, por kampionati është i gjatë dhe në analizën e sotme e kuptoi dhe skuadra që jemi në rrugën e duhur për të fituar kampionatin. Mua ky episod më ka dhënë forcë 10-fish më shumë që do realizoj objektivin titull kampion”, premtoi ai. (E.K/SHUPLAKA)
