Aktorja e njohur shqiptare me origjinë armene, Anisa Markarian është një ndër 32 artistët e dekoruar me titullin “Mjeshtër i Madh”, nga presidenti Bujar Nishani.
Përmes një statusi në Facebook, aktorja shpreh mirënjohjen e saj ndaj presidentit Nishani, për vlerësimin e marrë prej tij. Më tej ajo shprehet se dekoratën ua kushton prindërve të saj.
“NDER E PËRGJEGJËSI FRYMËZUESE
I nderuar Zoti President, Shkëlqesia Juaj,
Ju jam thellësisht mirënjohëse për vlerësimin e lartë që më bëni, duke më renditur mes emrave më të spikatur të artit e të kulturës shqiptare.
Marrja e Titullit «MJESHTËR I MADH» është dëshmia më bindëse që, kur u përkushtohesh me vullnet e cilësi, pasionet dhe talenti i lindur mund të ushtrohen mjeshtërisht.
Dekoratën e çmuar ua kushtoj prindërve të shtrenjtë, në shenjë falenderimi e mirënjohjeje për gjithçka të bukur e të rëndësishme që kam arritur në jetë falë edukimit të tyre.
Më ushqyen respektin për gjuhët e dy kombeve të mi, më përçuan prirjet artistike, më mprehën kërshërinë intelektuale.
Një mirënjohje të pafund e një përkushtim të posaçëm për dy shpirtra udhërrëfyes: dajën tim të paharruar, virtuozin e artit skenik, Prokop Mima, dhe poetin-qëndistar të ekranit të madh, kryemjeshtrin Viktor Gjika, të cilit më 23 qershor do t’i përkujtojmë 80-vjetorin e lindjes.
Jam e bindur se atje lart ku janë, sonte, që të dy, ndihen krenarë për mua.
Ju faleminderit nga zemra!
ANISA MARKARIAN 13.06.2017”, thuhet në postimin e aktores Makarian. (D.D/Shuplaka)
Discussion about this post