Goditja e rradhës presidentes së Koresë së Jugut, Park i ka ardhur nga antarët e partisë së saj. E ndodhur në telashe ajo mori një ultimatum nga anëtarët e partisë së saj që të përcaktojë një afat për dorëheqjen e saj ose të përballet me paditjen.
Disa ditë më parë, Park, e cila është dëmtuar rëndë nga një skandal për informacionet sekrete që përfshin mikeshën e saj, tha më herët se do të japë dorëheqjen nëse Parlamenti dëshironte kështu të premten që shkoi.
Deri më tani presidentja ka kërkuar falje publike tri herë, pasi u mor vesh se i kishte dhënë informacione sekrete mikeshës së saj Choi Soon-sil, por asnjë nuk ka dhënë rezultate. Kjo e fundit akuzohet se përdori lidhjet me presidenten për të marrë miliona dollarë donacione për fondacionin e saj. Shumë analistë mendojnë se dorëheqja është një mënyrë për Park, që të shmangë sikletin e paditjes, megjithëse partitë opozitare po tentojnë të bëjnë pikërisht këtë.
Anëtarët e pastisë së saj i kërkuan presidentes që ta sqarojë këtë deri të mërkurën, përndryshe do të votojnë për paditjen e saj. Për këtë nuk mjaftojnë vetëm votat e opozitës, prandaj kërcënimi i partisë është mjaft serioz.
Skandali që përfshiu presidenten shkaktoi protesta masive kundër saj, më të mëdhatë në Korenë e Jugut që prej protestave prodemokracisë në vitet ’80. Mijëra njerëz dolën në rrugë duke kërkuar dorëheqjen e presidentes, e cila sipas tyre nuk meriton më postin që ka.
Discussion about this post