Katër ditë pasi nga foltorja e Kuvendit deklaroi se e kishin kërcënuar në ambientet e Kryesisë së Kuvendit, deputetja Rudina Hajdari është marrë në mbrojtje nga ana e Policisë.
Burime bëjnë me dije për Faxweb.al se Hajdari është parë duke lëvizur me truproja në ambientet e Kuvendit, çka tregon se kërcënimi ndaj saj është marrë shumë seriozisht nga autoritetet.
Faktin që Hajdari mund të merrej në mbrojtje e paralajmëroi seancën e të hënës dhe kryeparlamentari Gramoz Ruçi, i cili tha se kishte njoftuar ministrinë e brendshme për kërcënimin ndaj deputetes demokrate.
Një nga të dyshuarit kryesorë, të paktën mediatik, për kërcënimin e Hajdarit ka qenë Korab Lita, pasi mes tyre ka pasur përplasje të vazhdueshme për kryesimin e grupit demokrat në Kuvend. Mirëpo i pyetur drejtpërdrejtë nga mediat për këtë akuzë, Lita e ka mohuar duke thënë se me Hajdarin janë vetëm kolegë.
“Është e papranueshme që një femër të kërcënohet, kanë ardhur persona në zyrë dhe më kanë kërcënuar. Merrni masa para se do të ketë viktimë në këtë Kuvend, asnjë deputet të mos hyjë pa u kontrolluar mirë, duhet të jemi seriozë”, u shpreh Hajdari seancën e së hënës në Kuvend.
Kërcënimi i Hajdarit, Ruçi tregon seriozitet për çështjen: Kam njoftuar Ministrinë e Brendshme dhe…
(E.K/Faxweb.al)
