Ministria e Brendshme, delegacioni i BE në Tiranë si dhe IOM & UNHCR prezantuan projektin “EU4Migration”, i cili ka për synim menaxhimin e migracionit dhe azilit në mënyrë efektive dhe transparente. Ambasadori i BE në Tiranë, Silvio Gonzato, gjatë fjalës së tij, theksoi se projekti do të ndihmojë në forcimin e kapaciteteve institucionale, përmirësimin e mekanizmave operativë si edhe rritjen e koordinimit mes të gjithë aktorëve të përfshirë në menaxhimin e migracionit.
Gonzato theksoi se mbështetja e dhënë përmes këtij projekti është pjesë e angazhimit më të gjerë të BE ndaj Shqipërisë dhe rithekson përkushtimin për stabilitetin dhe sigurinë në Ballkanin Perëndimor.
“Kjo është një dëshmi konkrete e partneritetit që ekziston mes Shqipërisë dhe BE-së, një partneritet që është i fortë në praktikë.”, theksoi Gonzato.
Projekti mbështet një sërë objektivash dhe angazhimesh politike të ndjekura nga qeveria shqiptare, përfshirë zbatimin e Strategjisë Kombëtare të Migracionit 2024–2027, e cila është në përputhje me standardet dhe prioritetet e BE-së.
“Ky projekt do të ndihmojë gjithashtu në mbështetjen e përpjekjeve të Shqipërisë për të shënuar përparim në procesin e anëtarësimit, siç u theksua nga zëvendësministri z. Andi Mahila gjatë mbledhjes së parë të Komitetit Drejtues. Është e rëndësishme që aktivitetet e këtij projekti të marrin përparësi. Mbështesim objektivat specifike që burojnë nga negociatat e anëtarësimit, në mënyrë që të arrihet progres urgjent. Megjithatë, dua të theksoj se ky projekt është këtu për të ofruar mbështetje, pjesa më e madhe e punës, përfshirë hartimin e mëtejshëm ligjor, sigurimin e funksionimit të mirë të shërbimeve përkatëse dhe ndarjen e mjaftueshme të buxhetit, duhet të realizohet para së gjithash nga autoritetet shqiptare.”, theksoi më tej ambasadori.
Ndërkohë, zëvendës ministri i Brendshëm Besfort Lamallari theksoi se:
“Rëndësia strategjike e projektit lidhet ngushtë ku fokusi do të jetë të ngritja e kapaciteteve operacionale për fluket emigratore, zhvillimin e mekanizmave të koodinuar për parandalimin në raste të rritje të flukseve. Ky projekt do të kontribuojë edhe në rritjen e kapaciteteve që lidhet me luftën kundër kontrabandimit të emigrantëve. Asistenca do të jetë tepër e vyer dhe objektivat e qeverisë në funksion të anagazhimeve të ndërmarra, për garantimin e të drejtave dhe lirive të emigrantëve dhe refugjatëve do të bëhen në realitet në përputhje të plotë me standartet e BE. “, tha Lamallari.
