Prishet armëpushimi, nisin luftimet në Aleppo

Vetëm një ditë pasi u arrit armëpushimi, kanë nisur sërish luftimet në qytetin e Aleppo-s në Siri.

Marrëveshja e arritur me shumë vështirësi të martën, parashikonte që evakuimet e para të civilëve të bllokuar pa ujë e pa ushqime, të fillonin sot në mëngjes herët.

Por, deri në mesditë CNN ka raportuar për rifillim bombardimesh në pjesën lindore të Aleppo-s, i cili ende kontrollohet nga kryengritësit.

Agjencia e lajmeve në Siri, SANA, raporton se një numër i madh personash kanë vdekur në të dy anët e qytetit, ndërsa rreth 50,000 civilë besohet të kenë mbetur brenda zonës së vogël të Aleppo-s lindore që ndodhel ende nën kontrollin e rebelëve.

Sipas zëdhënësit të Kombeve të Bashkuara, ushtarët sirianë në bashkëpunim me ushtrinë irakiane kanë vrarë plot 82 civilë sirianë, duke hyrë në shtëpitë e tyre dhe duke hapur zjarr.

Rusia akuzon luftëtarët e opozitës për shkelje të armëpushimit duke sulmuar pozicionet e trupave qeveritare.

Ndërsa Presidenti turk Recep Tayyip Erdogan, akuzoi forcat qeveritare siriane për shkelje të armëpushimit, dhe shtoi se Turqia po vazhdon përpjekjet për të krijuar një korridor për të evakuuar banorët nga Aleppoja.

Ndërkohë që luftimet po shkonin drejt fundit, një numër i madh sirianësh kanë dhënë lamtumirën sot nëpërmjet rrjeteve sociale.