Gazetari dhe analisti Blendi Fevziu ka reaguar në lidhje me debatin e fundit për prishjen e kullës së Prek Calir dhe shfaqjen e portretit të Enver Hoxhës në Pezë.
Ai, një shkrimi botuar në faqen “Opinion.al” thotë se debati për Prekë Calin dhe shfaqja e portretit të Enver Hoxhës në Pezë tregon edhe një herë tjetër se Shqipëria nuk është ndarë përfundimisht nga e kaluara.
“Debati për kullën e Prek Calit që u kthye në debat për rolin historik të tij; rishfaqja e fotove të Enver Hoxhës në Pezë, zgjedhja e Ruçit dhe Xhafës në krye të dy institucioneve të rëndësishme e ndezi sërish këtë debat”, shkruan Fevziu.
“Çështja e Kullës së Prek Calit mund të konsiderohej si një çështje administrative dhe ligjore, por ajo u shty në një debat për rolin e tij historik. Dhe nuk është një debat normal që ndihmon historinë, por një debat që diskuton sërish rolin e komunizmit në Shqipëri dhe qëndrimin ndaj tij.
Ngërthimi gjithë mllef në këtë debat i palëve që reflektojnë mënyra të ndryshme të të parit të periudhës komuniste, dëshmoi se ne jo që nuk e kemi mbyllur këtë diskutim siç ka bërë gjithë lindja, por mbetemi ndoshta justifikuesit e fundit të krimeve të komunizmit në botë!
Po kështu çështja e portreteve dhe simboleve të Enver Hoxhës dhe regjimit komunist në Pezë është sërish një paaftësi e kësaj shoqërie për të qenë e vërtetë dhe e paanshme. Historia vijon të shihet si argument i politikës së ditës dhe të gjithë kemi qenë të paaftë t’ju themi mjaft këtij abuzimi dhe “me fal” viktimave të saj, tha ai.
“Ne po bëjmë pikërisht këtë gabim fatal. Po sillemi sikur komunizmi nuk ka ndodhur”, vijoi Fevziu. (B.H/Shuplaka)
Discussion about this post