Kreu i grupit Parlamentar të Lëvizjes Socialiste për Integrim, Petrit Vasili, ka reaguar pas deklaratës së ministres së Shëndetësisë Ogerta Manastirlliu, lidhur me prishjen e ndërtimeve pa leje pranë spitaleve.
Sipas Vasilit, Ministria e Shëndetësisë është shndërruar në një drejtori komunale, duke qenë se kryeministri Edi Rama, edhe mandatin e kaluar e ka nisur me prishjen e ndërtesave pa leje pranë spitaleve. Madje edhe ka deklaruar se spitalet u spastruan nga ndërtimet pa leje.
“Ministria e Shëndetësisë ose drejtoria komunale.
Ministrja e Shëndetësisë tha se filloi të prishë ndërtimet pa leje nëpër spitale. Pra, e filloi nga këtu ndonëse ky nuk ishte në asnjë pikë të programit të qeverisë për shëndetësinë.
Në 2013-n, Kryeministri, me bujurdi të madhe, si edhe ministri i Shëndetësisë, mbytën televizionet dhe shqyen fytin duke thënë se i spastruan spitalet nga ndërtimet pa leje.
Kush është fajtori që qenkan ndërtuar prapë gjatë 2013-2017, apo u desantuan nga diku larg? Apo kryeministri iku për turizëm dhe nuk di gjë as për këtë?
Ndërtimet pa leje, i njëjti refren qesharak për shëndetësinë në çdo fillim mandati.
Ështe i qartë që s’ka asnjë vizion për shëndetësinë, s’ka strategji, ka vetëm
mediokritet antimjeksor dhe thellim të qorrsokakut ku ajo ka hyrë. Ky është shndërrimi i Ministrisë së Shëndetësisë në një drejtori komunale.”, reagon Vasili. (D.D/Shuplaka)
