Prishtina alarmon BE-në: Rrezikohet shtrirja e ndikimit rus në Kosovë

Alarmohet Kosova pasi rrezikohet shtrirja e ndikimit të Rusisë në vend. Sipas autoriteteve kosovare ka disa sinjale që e dëshmojnë këtë rrezik.

Ata madje kanë informuar edhe Bashkimin Europian lidhur me këtë.

Ministrja për Dialog në Qeverinë e Kosovës, Edita Tahiri, në një intervistë për “Radion Evropa e Lirë”, ka treguar edhe një nga shenjat e këtij ndikimi.

 “Sinjalet më të fuqishme ndërlidhen me faktin që Rusia ka një lidhje të veçantë me Serbinë, madje ka edhe një qendër ushtarake në Nish, që është afër kufirit me shtetin e Kosovës “,është shprehur Tahiri.

Ndër të tjera ajo shton se Rusia nuk ka qasje në Detin Mesdhe për shkak se NATO ia ka mbyllur rrugën, por kjo nuk ndodh nëse bëhet fjalë nga Serbia.

“Unë besoj se politikat strategjike të NATO-s ia kanë mbyllur rrugën Rusisë që të ketë dalje në Detin Adriatik, për faktin që rripi i NATO-s tashmë e mbulon gjithë bregun e Adriatikut prej Sllovenisë, Kroacisë, Malit të Zi, Shqipëri dhe Greqi, çka është shumë pozitive. Pra, Rusia nuk ka mundësi që të ketë qasje në Detin Mesdhe. Mendimi im është se përkundër agresivitetit rus, ndikimi i Rusisë mund të përfundojë vetëm brenda shtetit të Serbisë“, shton Tahiri.

Sipas ministres, në veri të Kosovës, ku katër komunat përbëhen nga popullata shumicë serbe, ka organizata të cilat angazhohen për fuqizimin e bashkëpunimit me Rusinë. (D.D/Shuplaka)