Këshilli i Ministrave ka miratuar mënyrën e re të llogaritjes së kontributeve të sigurimeve shoqërore dhe shëndetësore për ata persona që janë të vetëpunësuar dhe punonjësit e papaguar të familjes.
“Sipas Aktit Normativ, që mban datën 25 janar 2017, “kontributet e detyrueshme të sigurimeve shoqërore për personin e vetëpunësuar, përfshirë punëdhënësin e vetëpunësuar do të llogariten si përqindje mbi një pagë bruto, jo më të ulët se paga minimale në shkallë vendi dhe jo më të lartë se paga maksimale, e miratuar me Vendim të Këshillit të Ministrave.”, shkruan “GSH”.
Pra të gjithë të vetëpunësuarit në profesione të tilla si: avokat, noter, farmacist, arkitekt, përkthyes, inxhinier, etj, do të paguajnë sigurime mbi pagën minimale, që aktualisht është 22 mijë lekë.
Në rast se këta persona me profesione të lira dëshirojnë të vetësigurohen me një pagë më të lartë, ata janë të lirë të zgjedhin brenda kufirit të pagës maksimale, 97.030 lekë.
Lidhur me kontributet e detyrueshme të sigurimit shëndetësor, është përcaktuar se ato do të paguhen si përqindje mbi dyfishin e pagës minimale në shkallë vendi, pra mbi 44.000 lekë.
Akti Normativ përcakton dhe mënyrën si do të derdhen kontributet e detyrueshme të sigurimeve shoqërore dhe shëndetësore për punonjësin e papaguar të familjes.
“Personat juridikë ose fizikë, brenda dy ditëve pune pas regjistrimit në Qendrën Kombëtare të Biznesit ose në administratën tatimore, deklarojnë në organin tatimor listën e të punësuarve, pagën përkatëse, përfshirë për personin fizik edhe punonjësit e papaguar të familjes mbi 16 vjeç, me të cilët ai punon e bashkëjeton ligjërisht”,-thuhet ndër të tjera në vendim. (XH.A/SHUPLAKA)
