Në një postim në Facebook pas një takimi me biznese turistike në Sarandë, deputetja e Partisë Demokratike Ina Zhupa ngriti shqetësime serioze mbi gjendjen e infrastrukturës turistike në qytet dhe premtimet për një qasje të re me ardhjen në pushtet të PD.
“Turizëm pa ujë të pijshëm! Pa infrastrukturë, pa transport publik, pa jetë kulturore, me gjoba dhe kërcënime për afrofe në tatime dhe taksa” – shkruan Zhupa, duke denoncuar situatën aktuale. Sipas saj, impiantet e ujërave të zeza në Sarandë, të ndërtuara me fondet e taksapaguesve, nuk funksionojnë, për shkak se bashkitë nuk paguajnë energjinë elektrike, duke detyruar sipërmarrësit të blejnë pajisje të përkohshme për trajtimin e ujërave të ndotura.
Ajo deklaroi se me qeverisjen e Partisë Demokratike kjo situatë do marrë fund. “Shteti do marrë përsipër një pjesë të pagave të punonjësve të industrisë turistike jashtë sezonit. Do të investojmë në kulturë, mbrojtjen e trashëgimisë, diversifikimin e ofertës për turizëm gjithëvjetor, jo vetëm veror.”
Zhupa shtoi se infrastruktura turistike do të marrë prioritet të veçantë dhe problemi i ujërave të zeza do të marrë një zgjidhje përfundimtare. “Do të vendosim flamuj blu në të gjithë brigjet tona. Voto për turizëm madhështor!” – përfundon ajo.
