Ministri në detyrë për Evropën dhe Punët e Jashtme, Gent Cakaj, zhvilloi një vizitë zyrtare në Holandë, ku u prit në takim nga homologu i tij holandez Stef Blok.
Në takim u diskutuan marrëdhëniet bilaterale, reformat e ndërmarra nga qeveria shqiptare për përmbushjen e pesë prioriteteve kyçe, në kuadër të hapjes së negociatave me Bashkimin Evropian, si dhe pritshmëritë për hapjen e negociatave për anëtarësim.
Ministri në detyrë Cakaj dhe homologu i tij holandez nënvizuan arritjet e reformave të Shqipërisë veçanërisht në fushën e drejtësisë. Progresi i Shqipërisë është i padiskutueshëm edhe sipas vlerësimeve të palës holandeze.
Po ashtu, në mënyrë që të adresohen shqetësimet e ndërsjella, përfshirë shqetësimet në fushën e migracionit të parregullt, u vlerësua jashtëzakonisht bashkëpunimi bilateral midis mekanizmave të rendit dhe sigurisë, si dhe u dakordua për bashkëpunim të mëtejshëm strategjik në të ardhmen.
Ministri Cakaj theksoi nevojën për një vendim pozitiv të Këshillit për hapjen e negociatave të anëtarësimit, i cili do të ishte një mesazh inkurajues për Shqipërinë, rajonin e Ballkanit Perëndimor dhe perspektivën Evropiane të tij. Për më shumë, një proces i tillë do të kontribuonte në thellimin e momentit të reformave të nisura nga Shqipëria në përgjithësi.
Nëse diçka s’mund të vihet në pikëpyetje është pikërisht përmbushja e të gjitha kushteve teknike për hapjen e negociatave për anëtarësim në BE nga ana e Shqipërisë. Një vlerësim i tillë është artikuluar nga vetë Komisioni Evropian në raportin e fundit për Shqipërinë.
Shqipëria dhe Holanda do të vazhdojnë bashkëpunimin strategjik dhe, natyrisht, bashkëpunimin intensiv në fushën e procesit të integrimit evropian. Holanda njeh përparimin rrënjësor dhe ndryshimet cilësore që po karakterizojnë Shqipërinë në vijimësi.
Discussion about this post