Ministri i Drejtësisë, Ylli Manjani është takuar me ambasadorin e OSBE-së në Shqipëri, Bernd Borchardt.
Në këtë takim u vlerësua mjaft pozitivisht projekti “Drejtësi pa vonesa“.
Ministri Manjani u shpreh se do të jetë në mbështetje të këtij projekti, duke propozuar të mbahet në vëmendje shtrirja e tij në të tjera gjykata të vendit dhe veçanërisht në ato administrative.
Ambasadori Borchardt ka garantuar vijimin e asistencës përmes projektesh të rëndësishme, dhe informoi ministrin se janë në proces vlerësimi disa nisma konkrete me fokus sistemin penitenciar si dhe gjyqësorin.
Ministri Manjani theksoi ndër të tjera se institucioni që ai drejton do të tregojë një vëmendje të veçantë në drejtim të standardizimit të shërbimeve ligjore dhe se do të jetë plotësisht i fokusuar në përmirësimin e legjislacionit në vend.
Ambasadori Borchardt është shprehur optimist për zgjerimin e mëtejshëm të bashkëpunimit në të ardhmen në fusha me interes të përbashkët, sidomos në kuadër të zbatimit të Reformës në Drejtësi. (MD/SHUPLAKA)
